Энэ сарын 19-ний өдөр Төв аймгийн Бүрэн сумын нутагт том, жижиг хоёр тэнгэрийн биет унасан мэдээллийг манай сонин өчигдрийн дугаартаа нийтэлсэн билээ. Эх сурвалжийн мэдээлж буйгаар өчигдөр өглөө Улаанбаатар хотоос Онцгой байдлын ерөнхий газар, Тагнуулын ерөнхий газар, Цагдаагийнхан очиход тэнгэрийн жижиг биет хулгайд алдагдсан байжээ. Учрыг лавлахад Тагнуулынхан 21-ны орой Бүрэн сумын Засаг даргад "Тэнгэрийн биетийг байранд нь буцааж тавь” гэсэн аж. Тиймээс 21 -нээс 22-нд шилжих шөнийн 01 цагийн үед Бүрэн сумын Засаг даргын тамгын газрын дарга, Цагдаагийн хэсгийн төлөөлөгч, жолоочтойгоо явж тэнгэрийн биетийг байранд нь буцааж тавьсан байна. Эх сурвалжийн мэдээлж буйгаар Улаанбаатараас гарсан ажлын хэсгийнхэн 22-ны өглөө очиход жижиг тэнгэрийн биет тавьсан газраа байхгүй, алдагдсан байжээ. Дугаар шилжих мөчид Төв аймгийн Цагдаагийн хэлтсээс тодруулахад нэлээн эрэл сурал болсны дараа тэнгэрийн биетийг олсон хэмээн мэдээлэв.

С.ЦОГТБААТАР: СОЛИР БИШ САНСРЫН БИЕТ

Өчигдөр өглөө Улаанбаатар хотоос Одон opон судлал, Онцгойгийхон, Цагдаа, Тагнуул гээд албаны олон хүмүүс солир унасан Бүрэн сумыг зорьцгоожээ. Уг ажлын хэсэгт орж, солир унасан газар очсон ОБЕГ-ын Гамшигтай тэмцэх газрын дарга, комиссар С.Цогтбаатартай өчигдөр орой 20 цаг 10 минутад утсаар холбогдож, доорх асуултад хариу авлаа.

-Бүрэн суманд унасан солирын талаар мэдээлэл өгнө үү?

-Солир биш, сансрын биет. Хүний бүтээсэн хиймэл дагуул юм уу, сансрын хөлгийн ямар нэгэн эд анги байж магадгүй.

-Зарим хүмүүс мамай сонинд бинзений тэрэг ёмкосоо гээснийг та нар сүр бадруулж худал мэдээллээ гэж байна. Тийм юм биш биз?

-Ёмкос биш ээ. Тэнгэрээс унасан сансрын биет. Ажлын хэсгийнхэн удахгүй тодорхой мэдээлэл өгнө гэлээ.

Ж.Тагтаа