Монгол инженерүүдийн ур ухаанаар бүтсэн "JEA 800 D” маркийн троллейбус нийслэлчүүдэд үйлчилж эхлээд сар ч хүрээгүй байгаа билээ. Нийслэлд төдийгүй дэлхий дахинд ч хэрэгцээтэй байгаа эко машиныг НИТХ- аас баталсан 500 сая төгрөгийн хөрөнгөөр "Монголын цахилгаан тээвэр” ХХК-ийн инженерүүд зохион бүтээжээ. Энэ жил нийт таван Монбусыг гаргахаар төлөвлөн ажиллаж байгаа юм байна. Дээрх Монбусыг бүтээхэд гарч байгаа зардал нь гаднаас нийтийн тээврийн автобуснууд худалдаж авахаас хамаагүй хямд тусаж байгаа тул ирэх жил арван Монбус хийлгэхээр ирэх жилийн төсөвт суулгахаар төлөвлөж байгаа ажээ. Нийслэлд тулгамдаад байгаа агаарын бохирдолд ихээхэн нөлөөлдөг авто машины утааны бохирдлыг багасгах ажлын эхний алхам гэж нийслэлийн удирдлагууд онцолж байлаа.

Монбус нь тэжээлийн гурван эх үүсвэртэй бөгөөд агаарын бохирдлыг бууруулахад үнэтэй хувь нэмэр оруулж байгаа дээрх троллейбусыг нийслэлд нийлүүлэх төдийгүй гадаад улсад экспортод гаргах тухай асуудал яригдаж эхлээд байгаа ажээ. Мөн манай инженерүүдийн дараагийн нэг бүтээл нь суудлын авто машин юм. Дээрх суудлын авто машин нь 500 төгрөгийн зардал гаргаад 200 км хүртэл явах боломжтой гэж үзэж байгаа юм байна. Туршилтаар нэг суудлын авто машин хот дотор явуулж байгаа аж. Монгол хүний гайхамшигтай бүтээлээр дэлхийд гайхагдах цаг ойртож байна гэж албаныхан онцолж байлаа.