Microsoft корпораци Windows Phone 7 смартфоноо тун удахгүй зах зээлд борлуулж эхлэх гэж буйтай холбогдуулан энэ зах зээлд дэлхийд тэргүүлэгч Apple компанийн iPhone болон RIM компанийн Blackberry смартфоныг сүүлийн замд нь үдэх ёслол зохион байгуулж, шуугиан тариад байгаа

Windows Phone 7 смартфоны өнгө төрх бүхий хувцастай Microsoft-ын ажилтнууд асар том хэмжээтэй дуураймал iPhone болон Blackberry-г барьж, гудамжаар оршуулгын ёслолын байдалтай тус хоёр гар утсыг сүүлийн замд нь үдсэн. Түүнчлэн Microsoft-ын цоо шинэ бүтээл  Windows Phone 7 дээр дурдсан хоёр смартфоныг зах зээлээс шахан гаргаж, бүрэн утгаар нь "булшилж” чадна гэдгийг илэрхийлж, "триллер” бүжиг бүжиглэсэн юм.

Харин Microsoft-ынхон Google-ийг өрсөлдөгчөө гэж үзэхгүй байгаа бололтой байсан. Оршуулах ёслолд Google-ийн алдарт Android үйлдлийн системтэй смартфон харагдаагүй.

Дашрамд сонирхуулахад, Microsoft корпораци ирэх аравдугаар сарын 11-нд Windows Phone 7-г худалдаанд гаргахаа зарлаад байгаа юм.

---