Та бүхэн одоо блог гэж нэг иймэрхүү юм байна даа гэж өөр өөрийнхөөрөө ойлголттой болсон байгаа байх. Энэ удаа таны бодлыг арай илүү системтэй болгож эхлэх гээд учраа олохгүй байгаа эсвэл эхэлчихээд юу бичихээ мэдэхгүй байгаа блогоо амьдруулахад чинь туслахыг зорьлоо.

Хэрэглээгээр нь бид блогийг үндсэн 4 хэсэгт хувааж болно.

1. Хувийн блог
2. Сонирхлын блог
3. Мэргэжлийн блог
4. Бизнесийн блог

Эдгээр 4 ангиллын хувьд эхнээс нь эхлээд явах нь үр дүнтэй байдаг. Өөрөөр хэлбэл та ямар ч байсан блогоо нээ тэгээд өөрт тохиолдсон юуг ч хамаагүй, өөрийнхөө бодлоор л бич. Энэ үедээ та миний бичсэнийг хэн унших бол, юу гэж бодох бол гэж сэтгэлээ чилээх хэрэггүй. Учир нь эндээс л та бичих дур сонирхол, арга барилынхаа эхлэлийг тавих учраас хэнийг ч дуурайхгүй, хэнээс ч хамаарахгүй өөрийнхөөрөө бай.

Та хувийн блогоо хэсэг хөтлөөд ирэхээр аяндаа таны бичлэгийг уншсан хүмүүсийн сэтгэгдэл, тэдний хүлээж авч буй байдлыг та тусгаж аван тодорхой хэмжээгээр өөрийн сонирхлын дагуу хүмүүст зориулан бичиж эхлэнэ. Энд GUMP, Claus нарын болгийг жишээ авч болно. Сонирхлын блог нь уншигчийн тодорхой хүрээллийг бий болгож чаддаг учраас энэ төрлийн блог нь таны блог ертөнцөд өөрийн орон зайг бэхжүүлэхэд чухал үе юм. Энэ үед та уншигчийн сэтгэл зүйг илүү мэдрэх мэдрэмжтэй болсноор таны бичлэгийн арга барил, гарчиг сонголт зэрэг нь хүртэл эрс сайжрах болно.

Хувийн болон сонирхлын блог нь блог ертөнцөд таныг тодорхой хэмжээгээр нээж өгдөг ч гэсэн таны ажил, амьдралд нөлөөлөхүйц нөлөөллийг бий болгож чадахгүй. Эндээс мэргэжлийн блог хөтлөх ач холбогдол нь харагддаг. Мэргэжлийн блог нь тухайн хүн өөрийн нарийн мэддэг зүйлсийн талаар өөрийн үзэл бодол, туршлагаа бичиж эхэлснээр бий болно. Энэ төрлийн блогийг хөтөлснөөр таны тухайн мэргэжлийн салбарт үнэлэгдэх үнэлэмж эрс дээшлэнэ. Мөн тодорхой чиглэлээр дагнасан блог нь маш тодорхой уншигчдын сегментийг бүрдүүлж чаддаг учраас энэ шатнаас та блогоороо дамжуулан реклам сурталчилгаагаар мөнгө олох илүү боломжтой болж эхлэнэ. Жишээ нь сургалтан дээр ирсэн хүмүүсийн мэргэжил, сонирхол дээр үндэслэн хоолны жороор дагнасан блог, эсвэл аялал жуулчлалын чиглэлээр дагнасан блог байж болно гэж бид ярилцсан. Нэгэнт мэргэжлийн блог маань таны байр суурь, мөнгө санхүүд нөлөөлж болохуйц учраас та яг ямар сэдвээр ямар байдлаар голлон бичих, блогийн дизайн ямар байх гээд олон зүйлийг илүү нухацтай авч үзэх хэрэгтэй.

Бизнесийн блог нь ихэнхдээ байгууллагууд хэрэглэдэг хэлбэр юм. Байгууллагууд өөрийн хэрэглэгч, түншүүдтэйгээ илүү ойртохын тулд өөрийн байгууллагын гол гол хүмүүсээр дамжуулан блог хөтлүүлдэг жишиг бий. Энэ нь байгууллагын үндсэн вэбэн дээр тавигдах албаны, хөндий мэдээллээс илүүгээр хүмүүст дотно сэтгэгдэл төрүүлдэг. Мөн байгууллагууд тусгайлан маркетингийн зорилгоор блог хөтлөх нь ч бий.

Блогийг анхнаас нь маш амарханаар төсөөлж эхлүүлээд алхам алхамаар өргөжүүлэх нь чухал гэдгийг та маш сайн ойлгоорой гэж хүсээд энэ удаагийн хичээлээ өндөрлөе.