Тэгээд хэнийх нь ч өмч юм, бүү мэд учраас Гадаад харилцааны сайд Г.Занданшатар өнгөрсөн баасан гаригт чуулганы нэгдсэн хуралдаанд оролцохдоо УИХ-ын гишүүдээс асуух, хариулахын завсар “ток шоу” өрнүүлэв. Мөнхийн хөршүүд Монголын уул уурхай, дэд бүтцийн бүтээн байгуулалтын томоохон төслүүд дээр стратегийн түншлэлийн орчинд хэрхэн хамтрахаа хэлэлцэж байхтай зэрэгцэн элэгдэж хуучирсан байшин савны хэрүүл он жилүүдийн уртад тулга тойрон ужгирсаар. Монгол Улсын Ерөнхий сайдыг ОХУ-д айлчлах тоолонд өрнөдөг мега сэдвүүдийн дундуур минийх, чинийх гэлцэхэд хүргэдэг “алим” жижигдэхээргүй яршиг удах төлөвтэй.

Монголын төлөө гүрийж, улайх цайхдаа гэмгүй илүү чухал, хавьгүй жинтэй өчнөөн хэрэг байсаар байхад ердөө наймхан байрны тухайд Монголын Ерөнхий сайд болгон оросуудын өмнө очиж нүүрээ ширлэж явах ч гэж. Ерөнхий сайд С.Батболдыг өнгөрсөн оны арванхоёрдугаар сард Москвад айлчлах үеэр ОХУын Засгийн газар Улаанбаатар хотын Баянзүрх дүүргийн нутаг дэвсгэр дэх орон сууцны найман байр болон Сүхбаатар дүүрэгт байршилтай Орос, Монголын хамтарсан гуравдугаар дунд сургуулийн талаар хөндсөн тухай Гадаад харилцааны сайд Г.Занданшатар УИХ-ын гишүүдэд мэдээллээ.

Нэр дурдсан объектууд Монгол Улсын газар нутаг дээр оршиж байгаа үл хөдлөх хөрөнгө хэдий ч Монгол Улс, ОХУ-ын алины өмч болох нь хоёр талын дунд маргаан үүсгээд байгаа юм. С.Батболдын өмнөх Ерөнхий сайд С.Баярыг 2008 оны дөрөвдүгээр сард ОХУ-д айлчлалаар одоход мөн л уг асуудал хөндөгдсөн байна. Оросын Засгийн газрын тэргүүн Владимир Путин тэр үед Гадаад хэргийн яамныхандаа “Та нар иймхэн юман дээр юундаа хэрэг мандуулаад байдаг юм. Монголын талд шийдээд өгчихөөч” хэмээж байжээ. В.Путинийг тэгж нэг аятай дуугарснаас нь хойш хоёр сарын дараа Монголын Төрийн өмчийн хороо мөнөөх найман орон сууц, нэг сургуулийн асуудлаа Ерөнхий сайдынх нь хэлснээр ОХУ-аас лавлахад аль хэдийнэ “ямааны мах халуун дээрээ” биш болсон байв.

Ийнхүү эдгээр обьектыг манай өмч гэж үзсэн Монголын шүүхийн дүгнэлт мухардалд оржээ. Социализмын үед Зөвлөлтийн мэргэжилтнүүдийн амьдарч байсан 15 орон сууцны долоог нь ОХУ манай талд шилжүүлэн өгснөө хүлээн зөвшөөрдөг боловч үлдсэн найман байрыг өдгөө байрлаж байгаа газрынх нь хамт авах хүсэлтээ Оросын тал тавьж байна. Гуравдугаар дунд сургуулийн хувьд ч оросууд мөн адил байр суурь илэрхийлдэг. Монголын Засгийн газар эн тэргүүнд найман байрыг өөрийн өмч болгохоор зүтгүүлж ирсэн бөгөөд манай шүүхийн шийдвэр ч эдгээр орон сууцыг ОХУ-ын өмч биш хэмээж буй. Гэхдээ бас Монгол Улсын өмч болохыг нотолж чадсангүй.

Нэгэнт хэнийх нь ч өмч юм, бүү мэд учраас Монгол Улсын гадаад бодлогын үзэл баримтлалд тэргүүлэх харилцаа бүхий ОХУ-тай жижиг маргаан хадгалах нь хоёр улсын ард түмний ашиг сонирхолд нийцэхгүй хэмээн УИХ-ын гишүүд үзэж байгаагаа илэрхийлэв. Ц.Мөнх-Оргил энэ мухардлыг олон улсын хууль зүйн зарчмаар даруй шийдэхийг зөвлөсөн. Харин Д.Ганхуяг Монгол Улсын Үндсэн хууль, Үл хөдлөх хөрөнгийн тухай хуулийн дагуу эдгээр өмчийн “эзнийг” тогтоох хэрэгтэй гэсэн байр суурьтай байна. Тэрбээр “Үл хөдлөх хөрөнгийг оршиж байгаа газраас нь салгавал утга учраа алддаг юм” хэмээсэн нь хойд хөршийн улстөрчдөд дайсан үг болов уу.