2016 он гэхэд Орос улс Энэтхэгтэй хамтарч сөнөөгч онгоц үйлдвэрлэнэ. "Риа Новости" мэдээлж байгаагаар Орос Энэтхэг хоёр хамтран 2015-2016 он гэхэд тав дахь үеийн сөнөөгч онгоц бүтээхээр болжээ. Энэ тухай Цэрэг техникийн хамтын ажиллагааны холбооны албаны ерөнхийлөгчийн орлогч Александр Фомин " Энэ онгоцыг бүтээх явц бага зэрэг асуудалтай байгаа ч ойрын 5-6 жилд тав дахь үеийн онгоцыг бэлэн болгоно" гэж мэдэгджээ.

Энэтхэгтэй хамтран хийж байгаа онгоцны анхны туршилтын нислэгийг Комсомольск на Амуре дээгүүр өнгөрсөн нэг, хоёрдугаар саруудад туршаад эхэлжээ. Гэсэн хэдий ч энэ загвар нь одоогоор төслийн хэмжээнээс хэтрээгүй байна. Онгоцны хажуу талын хэсэгчилсэн деталиудыг гурав дахь орноос авч магадгүй байгаа аж. Хэрэв төсөл амжилттай болбол шинэ онгоц сөнөөгч, бөмбөгдөгч онгоцны аль альных нь ололттой талыг хослуулсан шилмэл техник байх бололтой.

2015 оноос эхлэн шинэ онгоц Оросын зэвсэглэлд орно. Харин 2020 оноос Энэтхэгийн агаарын цэргийн хэрэгцээнд нийлүүлэгдэх юм. Загварын тал дээр Оросууд нэг нисэгчтэйг сонирхож байгаа бол Энэтхэг хоёр хүнийхийг сонирхож байгаа аж.