Харин дараагийн зогсоол нь Кристофер Ноланы “Харанхуйн хөлөг баатрууд” кино юм.
Тав дахь долоо хоногтоо дараалан бокс-оффисыг тэргүүлж буй Камеруны шинжлэх ухааны сэдэвт, уран зөгнөлт “Аватар” кино ийнхүү дотоодын хэмжээнд 491.8 сая ам.долларын орлого олжээ. “20th Century Fox” кино компанийн бүтээсэн уг кино дэлхийн хэмжээнд 1.6 тэрбумын эзэн болсон бөгөөд Камеруны өөрийнх нь 1997 онд бүтээсэн “Титаник” киноны дараа хоёрдугаарт бичигдээд байгаа юм. “Титаник”-ийн тухайд дэлхийн кино театруудын дэлгэцээс 1.8 тэрбум ам.долларын ашиг олжээ. Кино студийн тэргүүн Крис Аронсон түүний талаар “Нэг авьяаслаг эр 10 жилийн дотор ердөө хоёр л кино хийлээ. Харин тэр хоёр кино нь бүх цаг үеийн хамгийн шилдэг киногоор тодроод байна. Үнэхээр гайхалтай биш гэж үү” хэмээн ярьжээ.

“Аватар” кино улсын хэмжээнд 460.9 сая ам.долларын орлого олсон “Оддын дайн”-ыг ардаа орхисон боловч борлогдсон тасалбарын хэмжээгээр “Оддын дайн” хамаагүй илүү байгаа юм. Учир нь өнөөгийн кино тасалбарын үнэ тухайн үеийнхээс нэмэгдсэн, дээр нь 3-D кино тасалбарын үнэ харьцангуй өндөр байдагтай холбоотой. Өдгөө Америкийн зах зээлд хамгийн өндөр орлоготой киногоор “Титаник” /600 сая/, харин дараа нь “Харанхуйн хөлөг баатрууд” /533.3 сая/ бичигддэг байна.