Нийслэлийн баянгол дүүргийн 10-р хорооллын ..-р байрны 2-р орцыг тэндхийн оршин суугчид "чөтгөртэй, хий юмтай” гэж итгэдэг аж. Тэдний яриагаар бол уг орцны 2-р давхрын 38 тоот од Болд хэмээх 50 орчим насны нэгэн өвгөн 30 настай хонгорхон зүстэй танхилхан бүсгүйтэй амьдардаг аж.
Тэд 5-6 жил амьдрахдаа хоорондоо ам мурийх нь үгүй, эвтэй найртай байсныг хөрш айлууд нь баталдаг. Гэтэл залуухан бүсгүй нэгэн өдөр угаалганыхаа өрөөнд халуун усны шугамны төмрөөс цахилгаан утсаар боомилон үхснийг холбогдох байгуулагынхан ирж шалгаад "гадны нөлөөгүй” гэсэн дүгнэдттэй буцсан.
Оршин суугчидын дунд тархсан хов жив, цуурхал ч гэмээр сэжүүрийг хөөвөл Болд өвгөн өтөлсөн хүн гэхэд шар сэмжилж 30 настай эхнэрээ хөгшин гэж голоод түүнээс ганц 2 насаар дүү Чимгээ хэмээх бүсгүйтэй явалдах болжээ. Үүнийг гадарлах болсон талийгаач эхнэр нь хардаж улмаар амиа хорлох болсон бололтой. Эхнэрээ оршуулаад долоо ч хоноогүй байтал явалддаг бүсгүйгээ гэртээ авчирч суулгажээ.
Гэтэл долоо хоногийн дараа нэгэн шөнө шинэ эхнэр нь хүний үс арзасхийтэл аймшигтай хашгиран өвгөнийхөө сүнсийг зайлуулчих дөхөв. Учир нь Чимгээг шөнө сэрээд хартал орных нь дэргэд нэлмийсэн платьетэй, цонхийсон царайтай хүүхэн зогсож байжээ. Бүсгүй эхэндээ нүдэндээ итгээгүй ч лавлаж харвал сарны гэрэлд яах аргагүй хүүхэн болох нь мэдэгдэж, сайтар бодвоос зургийн цомог дотор донжтойхон авахуулсан нөгөө талийгаач эхнэр нь дүрээрээ мөн болохыг таньсанаар хамаг хэрэг үүджээ.
Үүнээс хойш үдшийн бүрий болонгуут өнөөх хий үзэгдэл цонхных нь цаана тагтан дээр суугаад, шанаагаа тулан өрөөрүү нь ширтэж байхыг Чимгээ олантаа харах болж, харанхуй болонгуут л айдаг өвчтэй болжээ. Харин нөгөө сүнс нь өвгөнд огт үзэгдэхгүй харагддаггүй учир дуг нойрондоо дугжирчихдаг. Тэгээд хөөрхий бүсгүй бүх өрөөнийхөө гэрлийг асаагаад ийш тийш харж айж шөнийг өнгөрөөдөг болжээ.
Заримдаа угаалгынх нь өрөөнд эмэгтэй хүн гиншин уйлах дуулдсанаа, хаалга нь хаагдаж, өндөр өсгийтийн тог тогхийн ойртох нь цаанаа л аймшигтай. Тийнхүү Чимгээ нэг л орой дотуур хувцастайгаа үсээ сэгсийлгэчихсэн "Тэр намайг мөрдөж мөшгөөд байна шүү дээ. Түүнийг бариад аваач ээ” гэсээр 2 давхраас гүйн гарч, шатаар уруудсаар нэг мэдэхэд гудамжинд гарсан байлаа.
Бүсгүй эмнэлэгт хэвтэж эмчилгээ хийлгэсэн ч бие нь олигтой сайжирсангүй. Үг хэл нь ээдэрч, хүнтэй ярихдаа ээрч муурах болжээ. Нөгөө хий сүнсний тухайд тэр орцны 4 давхарын айлын тагтан дээр цэнхэр палаажтайгаа сууж байсныг нэгэн охин хараад гайхсан ч сүүлдээ өрөвдсөн тухайгаа бусдад ярьжээ. Харин төдий удалгүй энэ айлын тэр охин, тэдний хүү 2 цонхоороо нисч нас барсаныг олон хүн ярьдаг. Болд өвгөн Чимгээгээ дагуулсаар байраа маш хямдхан зараад арилж өгсөн гэнэ.