Америкийн агаарын нислэг, сансрын уудмыг шинжлэн судлах үндэсний төв /НАСА/ хоёр жилийн хугацаанд сансар судлалын салбарыг хөгжүүлэхэд 1,6 тэрбум доллар зарцуулах төлөвлөжээ. "CCDev2" буюу "сансрын такси" хөтөлбөр хувийн компаниудтай НАСА-гийн урьд нь байгуулсан тохиролцоонуудыг өргөжүүлэх юм.
Уг хөтөлбөр 2012 оны долдугаар сараас хэрэгжиж эхэлж, 2014 оны хавар дуусна. Энэ хугацаанд "Боинг", "Спейс-экс", "Сьерра-Невада", "Блю орижин гэсэн дөрвөн компани зөөгч пуужин, сансрын хөлөг, гарааны талбай болон туслах дэд бүтцийг барьж байгуулна. Энэ арван жилийн дундуур Олон улсын сансрын станц руу хүн болон ачааг хялбар аргаар хүргэх арга замыг бий болгох нь энэ төслийн зорилго юм.
"Энэ нь АНУ-ын сансар судлалыг хөгжүүлэх чиглэлд хийж томоохон алхам юм. Шинэ хөтөлбөр баталсан нь манай байгууллага Олон улсын сансрын станц руу хүн болон ачаа хүргэх эрхийнхээ нэг хэсгийг хувийн компаниудад шилжүүлэх боломж олгоно. НАСА-гийн ажилтнууд сансрыг гүн гүнзгий судлах гол зорилтдоо хүч чадал, нөөцөө төвлөрүүлэх боломжтой болно" гэж НАСА-гийн тргүүн Чарльз Болден мэдэгджээ.
Сансрын жолоодлогот нислэгийн "Спейс шаттл" хөтөлбөрийг хэрэгжүүлж дуусахаар америкчуудыг Ангараг гараг руу илгээх сансар судлалын шинэ гарцыг нээх томоохон зорилтыг АНУ-ын Ерөнхийлөгч Барак Обама НАСА-т тавьжээ.