Монгол Улсын гавьяат жүжигчин, ард түмний хайртай алиалагч, авьяаслаг жүжигчин Дамбын Батсүх дөрөвдүгээр сарын 28-нд өвчний улмаас таалал төгслөө. Тэрбээр 1956 оны арван хоёрдугаар сарын 15-нд Улаанбаатар хотод төрж, 1972-1974 онд гавьяат жүжигчин Ж.Раднаабазарын нэрэмжит Циркийн дунд сургуульд суралцаж байгаад 1974-1976 онд Москва хотын Цирк, эстрадын дунд сургуульд шилжин суралцаж Монголын анхны мэргэжлийн алиалагч болсон билээ.
Д.Батсүх нь 1976-1992 онд Улсын циркт алиалагч, акробат, агаарын нисэлтийн жүжигчнээр, 1992-1995 онд "Шандас” циркт дэд захирал, алиалагч, 1996 оноос чөлөөт уран бүтээлчээр ажиллаж байсан юм.
Монголын ард түмэн төдийгүй дэлхийн таван тивийн үзэгчдэд инээд бэлэглэж, авьяасаа гайхуулж явсан нэрт алиалагч Д.Батсүх Улсын циркт ажиллаж байх хугацаандаа Соёлын тэргүүний ажилтан цол тэмдэг, Алтан гадас одонгоор шагнуулж байсан ба 1996 онд Монгол Улсын гавьяат жүжигчин цол хүртсэн юм.
Цирк болон хошин урлагт амьдрал, уран бүтээлээ зориулж, ард түмэндээ инээд түгээсэн хамгийн өглөгч хүн гэж түүнийг л хэлэх байх. Түүгээр ч зогсохгүй цирк болон хошин урлагийн ирээдүй хойч үеийг бэлтгэсэн багш билээ. Бидний ангийн анд, хамтран зүтгэгч Б.Батсүхийн цайлган зан, халгиж цалгисан авьяас билэг нь бидний зүрх сэтгэлд үүрд хоногшин үлдэж, Монголын ард түмэн үеийн үед дурсан явах болно.
