Дэлхийн нэр хүндтэй сэтгүүлүүд үргэлж л алдартай одод загвар өмсөгч, спортын алдартнуудын зургийг хавтсан дээрээ тавьдаг. Сэтгүүлийн хавтсыг "чимдэг" оддыг харсан өсвөр насныхан тэдэн шиг болохыг мөрөөдөн өөрийн царай зүс бие галбирыг голох тохиолдол гадаадад олонтоо байдаг.

Бүр амиа хорлож ч байсан удаа бий. Гэвч охид бүсгүйчүүдийн мөрөөдөл бас атаархлыг дагуулдаг тэдний бие галбир, төрх нь сэтгүүлийн хавтсан дээрх шигээ "төгс" байдаггүй байна.

Тэдний сэтгүүлд гардаг зургууд компьютерийн программын ач тусаар бүтсэн уран сайхны бүтээл байдаг аж. Харин энэ тухай Попын гүнж Бритни Спирс зоригтойгоор дуугарч сонин, сэтгүүл, плакат болон цомгийнхоо хавтасны зургийг үргэлж компьютерийн засвар хийлгэдгээ ярьжээ.

Тэр ч байтугай ижил зургийг засвар хийлгэсэн болон хийлгээгүйгээр нь харьцуулан үзүүлсэн байна. Тэрээр зургаа янзлуулахдаа бэлхүүс, гуяа нарийсган туранхай болгож шивээсээ хүртэл арилгуулдаг байна.