Премьер Лигийн аварга Челси клуб гол өрсөлдөгчдийн нэг Ливерпүл багаас хагас хамгаалагч Иосси Бенаюныг 6 сая орчим фунтээр худалдаж авч байгаагаа албан ёсоор зарлалаа.30 настай Израйль тоглогч 3 жилийн гэрээ байгуулсан бөгөөд Жо Коулыг явснаас хойш Челси клубтэй холбогдон, очих тухай цуурхал дэгдээд байсан. Тэрээр 7-р сарын 5-аас эхлэн Челсигийн улирлын өмнөх бэлтгэлд багтайгаа гарах бололтой. Бенаюн Ливерпүлд 3 улирлыг өнгөрүүлсэн бөгөөд 92 тоглолтонд 18 гоолыг оруулсан багийн гол тоглогчдын нэг байсан юм.

Челсигийн вебсайтад хэлэхдээ тэрээр "Би Челсид ирсэндээ үнэхээр баяртай байна, энэ бол маш том клуб, энд тоглоно гэдэг тоглогч болгоны мөрөөдөл. Мөн бид хамтдаа амжилттай он жилүүдийг өнгөрүүлнэ гэдэгт итгэж байна” гэж хэлжээ.
Харин дасгалжуулагч Карло Анчелотти хэлэхдээ "Бид шинэ тоглогч авсандаа маш баяртай байна. Иосси бол хагас хамгаалалтын шугамд хаана ч тоглож чадах төгс тоглогчдын нэг, тэр маш олон талтай тоглолттой. Би түүний тэмцэгч чанар болон талбай дээр үзүүлдэг тоглолтонд дуртай, мөн тэрээр ирэх улиралд бидэнтэй хамт гялалзах болно” гэжээ.
Харин Ливерпүлийн хэвлэлийн төлөөлөгч хэлэхдээ "Иоссигийн явах болсон шийдвэр нь хэдэн долоо хоногийн өмнө Бенитезтэй хийсэн түүний уулзалтын дараа гарсан. Ливерпүл клубтэй холбоотой хүн бүхэн түүнд амжилт хүсч байна” гэсэн байна.

Челси энэ зуны эхний наймаагаа хийлээ. Тэд Жо Коул, Михайл Баллак нарыг явуулсныхаа дараа ийн Иосси Бенаюныг авч байгаа юм. Харин Ливерпүл "аймшигтай” улирлын дараа шинэчлэлтийг багтаа хийх төлөвтэй байна. Шинэ дасгалжуулагч Р.Ходжсон ч энэ тухайгаа мэдэгдээд байгаа билээ.