|
Хүүхдийн мөнгө хаврын чуулганы бас нэгэн халуун сэдэв болох нь тодорхой байна. Төсвийн байнгын хороо өчигдөр энэ оны төсвийн тодотгол, Нийгмийн даатгалын сангийн 2010 оны төсвийн тухай хуульд нэмэлт, өөрчлөлт оруулах, Хүний хөгжил сангийн 2010 оны төсвийн тухай хуульд өөрчлөлт оруулах хуулийн төслүүдийн хоёр дахь хэлэлцүүлгийг хийх байлаа.
Гэвч АН-ын бүлэг хэлэлцүүлгээс завсарлага авав. Цөөнхийн бүлэг хүүхдийн мөнгийг төсвийн тодотголд тусгах боломжтой гэж үзэж байгаа юм. Хүүхдийн мөнгийг олгохыг Засгийн газар дэмжээгүй, мөн МАХН-ын бүлэг ч ийм байр суурьтай байна. Тэд хүүхдийн мөнгийг Хүний хөгжил сангаас иргэн бүрт олгож буй мөнгөөр орлуулж болно хэмээн тайлбарлаж байгаа юм.
Харин АН-ын бүлэг хүүхдийн мөнгийг ирэх сарын 1-нээс, эсвэл намраас өгөх боломжтой, хөрөнгийг төсвийн тодотголд суулгана гэж зүтгэсээр байна. Хүүхдэд мөнгөн тэтгэмж олгох тухай хуулийн төслийг УИХ-ын даргад үдээс хойш өргөн барих тухай зар хэвлэлийнхэнд тарав. Хуулийн төслийг АН-ын Р.Гончигдорж, Н.Батбаяр, МАХН-ын Д.Оюунхорол нар санаачилсан юм.
15 цагт УИХ-ын даргад төсөл өргөн барихаар байсан ч Д.Оюунхорол гишүүн хоцорч, АН-ын хоёр гишүүн спикерийн өрөөнд төслөө барьсаар урьтаж орсон байв. Энэ хооронд Д.Оюунхоролыг намын дарга нь дуудаж баахан бангаджээ.
|
