МҮОНТ-ийн бүтээл "Тусгай салаа” кино ид сонирхолтой дээрээ үргэлжилж буй
энэ өдрүүдэд тус киноны гол дүрийн нэг Дэндэв ёстой нэг од болон
гялалзаж байна. Киног хамгийн ихээр чимсэн, хамгийн энгийн хийгээд
хөгжилтэй гэж болох Дэндэвийн дүрийг жүжигчин Т.Эрдэнэбаяр бүтээжээ.
Хөдөөний эгэл бор залуугийн дүрийг элдэв маяг, чимэггүйгээр тун
чадварлаг бүтээсэн Т.Эрдэнэбаяр өдгөө МҮОНТ-ийн Кино албанд ажилладаг
бөгөөд "Тусгай салаа” кино түүний жүжигчний карьерыг өсгөөд зогсохгүй
чамгүй дуучин болохыг нь нээж өгсөн бололтой.
...Уулын буга урамдах цагаар
Унаган нутгаа зорино оо, би
Усны толио царцахын цагтаа
Ухаант аавдаа очино оо, би...Одоо
бол үг, ая нь олон хүний амнаас хүлхсэн чихэр шиг салахаа болиод байгаа
энэ дууг "Тусгай салаа” кинонд Дэндэвийн аялахыг та хэдэнтээ сонсоо
биз ээ. Энэ дууг Дэндэвийн дүрээр танил болоод буй жүжигчин
Т.Эрдэнэбаяр өөрөө дуулжээ. Хамгийн сонирхолтой нь, хэдэн жилийн өмнө
бичүүлсэн дуу нь тухайн үед олны анхааралд өртөөгүй өнгөрсөн бол "Тусгай
салаа” киноны ачаар одоо л жинхэнэ "од” болж байгаа бололтой. FM
радиогийн зохиолын дууны захиалгын ихэнх хувийг эзлэх болсон "Ааваа
зорино” дуу хит парадын жагсаалтад ч гэсэн С.Жавхлангийн хит дуунуудаас эхлээд Монголын шилдэг зохиолын дуучдын дууг
хүртэл ардаа орхиж байгаа гэсэн шүү.
Т.Эрдэнэбаяр нь СУИС-ийг жүжигчний мэргэжлээр төгссөн. Өдгөө 31 настай, МҮОНРТ-ийн кино программын албанд дуу оруулагчаар ажилладаг ба эхнэр охин, хоёр ихэр хүүгийн хамт амьдардаг гэнэ.
Тэрбээр одоо "Өнгөт инээд” хамтлагийн уран бүтээлчидтэй хамтран "Олз” гэдэг инээдмийн кинонд цагдаагийн дүр бүтээж байгаа ба зураг авалт дуусах шатандаа явж байгаа ажээ.