Чимээ аниргүй нам жим байлаа. Шарилжны үнэр ханхийж хаяа нэг салхи сэвэлзэнэ. Баттөмөр харанхуй байшин руу явж орлоо. Нүдэнд юу ч үл үзэгдэх учир Баттөмөр машинаас буухдаа урьдаас зэхсэн гар чийдэнгээ асааж өмнөх замаа гэрэлтүүлэв. Хог новш хаа сайгүй хөглөрсөн байх бөгөөд хөгц, чийгний эхүүн үнэр ханхалж эхэллээ. Баттөмөр зүүн гартаа гар чийдэн атгаж, баруун гараараа буугаа шагайсаар дотогшоо аажимхан гэтэв.